 ვენესუელა ზეიმობს: მისმა მორიგმა წარმომადგენელმა სილამაზის საერთაშორისო კონკურსზე გაიმარჯვა. "მის მსოფლიო 2011"-მა სხვა ქვეყნების წარმომადგენელი 112 მზეთუნახავი უკან ჩამოიტოვა. 22 წლის ივიან სარკოსმა კიდევ ერთი მნიშვნელოვანი წვლილი შეიტანა სილამაზის კონკურსებზე ვენესუელელთა საერთაშორისო მიღწევების სიაში.მისი გამარჯვების წყალობით ვენესუელა პლანეტის ერთადერთი ქვეყანა გახდა, რომლის წარმომადგენლებმა უკვე ექვსჯერ გაიმარჯვეს "მის სამყაროს" კონკურსში და ამდენჯერვე - "მის მსოფლიოს" კონკურსში.
ამჯერად ცერემონია ლონდონში გაიმართა და გამარჯვებულის გამოცხადებისთანავე ვენესუელის დედაქალაქი ნამდვილმა დღესასწაულმა მოიცვა. კარაკასში ყველა ზეიმობდა და ერთმანეთს მორიგ გამარჯვებას ულოცავდა.მიუხედავად ახალგაზრდა ასაკისა, ივიან სარკოსს უკვე ბევრი რამ გადაუტანია და არა მხოლოდ გაარეგნული მონაცემებით, არამედ ბეჯითი შრომითაც მიაღწია ასეთ წარმატებას. საქმე ის არის, რომ გოგონა ვენესუელის პროვინციიდანაა, თანაც, მრავალშვილიანი ღარიბი ოჯახიდან. თავის 12 და-ძმასთან ერთად რვა წლის ასაკში დაობლდა ორი უბედური შემთხვევის წყალობით - რომელმაც ჯერ დედა წაართვა, მერე - მამა. ივიანი დედათა მონასტრის ბავშვთა თავშესაფარში იზრდებოდა და მონაზვნობასაც აპირებდა, თუმცა ხანგრძლივი ფიქრის შემდეგ უარი განაცხადა მონასტრის კედლებში დარჩენაზე.გამუდმებით სწავლობდა და მუშაობდა, მერე კი იღბლიანი შემთხვევის წყალობით კონკურს "მის ვენესუელა-2010"-ის შესარჩევ ტურზე მოხვდა და მეორე ადგილი დაიკავა, რამაც მისცა საშუალება, "მის მსოფლიოს" კონკურსზე გამგზავრებულიყო.თუმცა სანამ ლონდონში გაემგზავრებოდა, ივიან სარკოსმა მედდების კურსები დაამთავრა და კეთილი საქმეების კეთებაც დაიწყო: ინდიელ ბავშვებს ეხმარებოდა ამასონასის შტატში, კარაკასის ბავშვთა სახლებსა და საავადმყოფოებს სტუმრობდა. გარდა ამისა, შექმნა საქველმოქმედო ფონდი მჭევრმეტყველური სახელწოდებით "სილამაზე ადამიანების სამსახურში", რომელიც ცდილობს, ღარიბ ვენესუელელებს დაეხმაროს.
[/size]
|
574
301
1050
